ॐ भद्रं कर्णेभिः शृणुयाम देवा भद्रं पश्येमाक्षभिर्यजत्राः ।
स्थिरैरङ्गैस्तुष्टुवा सस्तनूभिर्व्यशेम देवहितं यदायुः ॥
स्वस्तिन इन्द्रो वृद्धश्रवाः स्वस्ति नः पूषा विश्ववेदाः ।
स्वस्तिनस्तार्क्ष्यो अरिष्टनेमिः स्वस्ति नो बृहस्पतिर्दधातु ॥
ॐ शान्तिः! शान्तिः!! शान्तिः!!!
हरिः ॐ॥ अथ सूर्यारथर्वाङ्गिरसं व्याख्यास्यामः ।
ब्रह्मा ऋषिः ।
गायत्री छन्दः ।
आदित्यो देवता ।
हंस: सोऽहंमग्निनारायणयुक्तं बीजम् ।
ह्ल्लेखा शक्ति: ।
वियदादिसर्गसंयुक्तं कीलकम् ।
चतुर्विधपुरुषार्थसिद्धयर्थे विनियोगः ।
षट्स्वरारूढेन बीजेन षडङ्ग रक्ताम्बुजसंस्थितम् ।
सप्ताश्वरथिनं हिरण्यवर्णं चतुर्भुजं पद्मद्वयाभयवरदहस्तं कालचक्रप्रणेतारं श्रीसूर्यनारायणं य एवं वेद स वै ॐ ब्राह्मणः ।
ॐ भूर्भुवः स्वः ।
ॐ तत्सवितुर्वरेण्यं भर्गो देवस्य धीमहि ।
धियो यो नः प्रचोदयात्।
सूर्य आत्मा जगतस्तस्थुषश्च ।
सूर्याद्वै खल्विमानि भूतानि जायन्ते ।
सूर्याद्यज्ञःपर्जन्योऽन्नमात्मा ।
नमस्त आदित्य त्वमेव केवलं कर्म कर्ताऽसि ।
त्वमेव प्रत्यक्षं ब्रह्मासि ।
त्वमेव प्रत्यक्षं विष्णुरसि ।
त्वमेव प्रत्यक्षं रुद्रोऽसि ।
त्वमेव प्रत्यक्षमृगसि ।
त्वमेव प्रत्यक्षं यजुरसि ।
त्वमेव प्रत्यक्षं सामासि ।
त्वमेव प्रत्यक्षमथर्वासि ।
त्वमेव सर्वं छन्दोऽसि ।
आदित्याद्वायुर्जायते ।
आदित्याद् भूमिर्जायते ।
आदित्यादापो जायन्ते ।
आदित्याज्योतिर्जायते ।
आदित्याद् व्योम दिशो जायन्ते ।
आदित्याद्देवा जायन्ते ।
आदित्याद्वेदा जायन्ते ।
आदित्यो वा एष एतन्मण्डलं तपति ।
असावादित्यो ब्रह्म ।
आदित्योऽन्तःकरणमनोबुद्धिचित्ताहंकारा ।
आदित्यो वै व्यानः समानोदानोपानः प्राणः ।
आदित्यो वै श्रोत्रंत्वक्चक्षुरसघ्राणा: ।
आदित्यो वै वाक्पाणिपादपायूपस्थाः ।
आदित्यो वै शब्दस्पर्शरूपरसगन्धाः।
आदित्यो वै वचनादानागमनविसर्गानन्दाः ।
आनन्दमयो ज्ञानमयो विज्ञानमयो आदित्य: ।
नमो मित्राय भानवे मृत्योर्मां पाहि भ्राजिष्णवे विश्वहेतवे नमः ।
सूर्याद् भवन्ति भूतानि सूर्येण पालितानि तु ।
सुर्ये लयं प्राप्नुवन्ति यः सूर्यः सोऽहमेव च ।
चक्षुर्नो देवः सविता चक्षुर्न उत पर्वतः।
चक्षुर्धाता दधातु न: ।
आदित्याय विद्महे सहस्रकिरणाय धीमहि ।
तन्नः सूर्यः प्रचोदयात् ।
सविता पश्चात्तात्सविता पुरस्तात्सवितोत्तरात्तात्सविताधरात्तात् ।
सविता नः सुवतुसर्वतातिं सविता नो रासतां दीर्घमायुः ।
ओमित्येकाक्षरं ब्रह्म घृणिरिति द्वै अक्षरे ।
सूर्य इत्यक्षरद्वयम् ।
आदित्य इति त्रीण्यक्षराणि ।
एतस्यैव सूर्यस्याष्टाक्षरो मनुः ।
यः सदाहरहर्जपति स वै ब्राह्मणो भवति ।
स वै ब्राह्मणो भवति ।
सूर्याभिमुखो जप्त्वा महाव्याधिभयात्प्रमुच्यते ।
अलक्ष्मीर्नश्यति ।
अभक्ष्यभक्षणात् पूतो भवति ।
अगम्यागमनात्पूतो भवति ।
पतितसम्भाषणात्पूतो भवति ।
असत्सम्भाषणात्पूतो भवति ।
मध्याह्न सूर्याभि मुखः पठेत् ।
सद्योत्पन्नपञ्चमहापातकात्प्रमुच्यते ।
सैषां सावित्री विद्यां न किञ्चिदपि न कस्मैचित्प्रशंसयेत् ।
य एतां महाभागः प्रातः पठति स भाग्यवाञ्जायते ।
पशून् विन्दति ।
वेदार्थांल्लभते ।
त्रिकालमेतज्जप्त्वा क्रतुशतफलमवाप्नोति ।
यो हस्तादित्ये जपति स महामृत्युं तरति ।
स महामृत्युं तरति ।
य एवं वेद ॥ इत्युपनियत् ॥
ॐ भद्रं कर्णेभिः शृणुयाम देवा भद्रं पश्येमाक्षभिर्यजत्राः ।
स्थिरैरङ्गैस्तुष्टुवा सस्तनूभिर्व्यशेम देवहितं यदायुः ॥
स्वस्ति इन्द्रो वृद्धश्रवाः स्वस्ति नः पूषा विश्ववेदाः ।
स्वस्तिनस्तार्क्ष्यो अरिष्टनेमिः स्वस्ति नो बृहस्पतिर्दधातु ॥
ॐ शान्तिः! शान्तिः!! शान्तिः!!!
श्री सुर्य देव चरणार्पणमस्तु
श्री शुभं भवतु
---------------------------------------------------------------------------